本文重點
又到復活節長假期，好多政商界大忙人都會出埠輕鬆吓，當中以富士攝影器材有限公司主席孫大倫最豪，去中東同非洲旅遊一個月。悠長假期分三部分旅程，首先坐豪華郵輪暢遊包括迪拜嘅阿聯酋七個小國，然後再過紅海去埃及呢個文明古國，除參觀首都開羅博物館嘅歷史文物珍藏，仲會暢遊尼羅河同沿岸嘅神殿古蹟；尾站再轉往鄰近嘅約旦，並會喺電影《聖戰奇兵》拍攝場地Petra（佩特拉）古城住宿，喺漆黑嘅環境下欣賞星空。咁豪華又浪漫嘅旅程，真係夫復何求！
王以智去土耳其睇古蹟
做開攝影器材生意嘅孫老闆話，今次會帶兩部相機去影靚相，回港後會將啲靚相製作成靚相簿好好珍藏。
至於滙豐銀行亞洲私人銀行服務行政總裁王以智，就選擇去土耳其睇古蹟；新界鄉議局主席劉皇發就去惠州玩一兩日；青年事務委員會主席陳振彬就會帶兩個愛兒去新加坡環球片場大玩特玩，過一個開心復活節。