正如喺高鐵撥款爭議釀成警民衝突一役之後，煲呔曾走出嚟話政府要加強同年輕人溝通，但下一句就鞭撻班「80後」衝擊立法會。而早前嘅青年高峰會，佢優哉游哉去放假，揼低壇嘢畀下屬，當時就有「80後」當場掟鞋抗議，搞到場面混亂，令人質疑究竟負責青年事務嘅青年事務委員會，對「80後」青年有幾了解。

80後依舊人丁單薄

話時話，青年事務委員會早前就畀立法會議員踢爆根本唔年輕，二十八名非官方委員當中，逾半係「50後」嘅中年人，「80後」更少到只得三個，比率僅得一成。「80後」人丁單薄，聲細細，點可能影響到委員會嘅決定？

政府急急補鑊，尋日委任十個新成員去填補九個落莊嘅舊人，新人當中，屬於「50後」嘅幾乎絕迹，「60後」同「70後」嘅就加咗些少，「80後」嘅就有三個，當中有啲仲係嚟自建制派同委任區議員，可見煲呔曾又係用人唯親。

屬於「70後」嘅鄭家豪係南拳高手，獲獎無數，亦曾擔任奧運火炬手；同樣係「70後」嘅呂宇俊喺九一年首次會考得零分，之後發奮苦讀成材，○六年獲選為十大傑出青年；「80後」嘅蘇柏軒係香港管弦樂團嘅出色助理指揮家，另外兩個「80後」就係北區區議員劉國勳同大學生吳雅媛。

煲呔曾當然唔會委任「掟Bra男」、「掟鞋男」同「掟廿蚊男」入呢個委員會啦，但睇真啲，委員會以前有三個「80後」委員，今次就換走一個，加加減減後都唔係多幾多，咁對個委員會嘅影響力有幾大呢？

佢以為喺張藥單度略為修改，整色整水就可以瞞天過海，令外界誤以為政府對「80後」嘅重視程度提高，原來都只係換湯不換藥啫！呢劑藥又點會有效先得㗎！可見亂落藥嘅煲呔曾點止係黃綠醫生，直情係庸醫就真。

不過，委員會主席陳振彬就反駁話：「立法會都冇『80後』議員啦，莫非就唔可以決定『80後』青年政策？」佢又話，包括「80後」在內嘅最後生青年委員，會專責參與委員會轄下國際交流同會議小組工作，務求達至同年輕人溝通嘅目的。