消防處尋日舉辦處長答問大會，有大約二百位消防員出席。話就話呢個係管理層同前線消防員溝通對話嘅平台，不過現場睇落似聲討大會多啲。有與會消防員大吐苦水，話人手同資源嚴重不足，要求削減工時及加快更換抗火衣；亦有人直指消防設備落後，隨時會影響工作表現甚至危及生命。

現場氣氛火爆，幾乎變埋「火場」。不過，出席大會嘅消防處處長盧振雄似乎冇乜「救火」招數，只承諾會為前線力爭增加資源，對於人手問題，暫時只能以超時補水解決。一句講晒，資源難加，工時難減。

叮！講嚟講去又係「冇水」，仲點救火呀？煞有介事搞場答問大會，居然答非所問，消防員關注嘅舊問題未解決，勢必引來更多不滿，令前線怨氣加深。消防處高層迫於輿論壓力同前線嘅不滿，為平息民憤做場答問騷，救唔到火不特止，仲無端端辣多一個火頭，真係唔搞好過搞。

查實，自從長沙灣工廠大廈四級大火導致又有消防員英勇殉職，消防人手同設備不足問題再次引起關注。尋日有出席大會嘅消防員踢爆，目前有九成消防局人手唔夠，六個人嘅工作量要由四至五個人分擔，做到踢晒腳；防火衣更加要着到溶溶爛爛至有得換。

早前有消防處工會人士透露，好多消防局都唔齊車，好似深井消防局咁，得一輛升降台，根本冇辦法照顧全區需要；有啲消防局甚至被削車，人手長期短缺。但購買新設備只聞樓梯響，遲遲未能落實；就算部分新裝備已經抵港，亦無法及時投入使用。

叮！祝融無情，人命關天。消防既涉及市民生命財產，亦關乎前線人員安危，無論人手、設備定培訓都唔能夠兒戲。從○七年荃灣品質工業大廈大火，到○八年嘅旺角嘉禾大廈大火，再到最近嘅長沙灣工廠大廈四級火，本港已經先後有四名救火英雄懷疑因設備落後等原因殉職，情況令人擔憂。

話到尾，如果消防工作得到足夠重視同獲得足夠資源，管理層做好監管工作，前線人員換上先進設備，以上悲劇或者可以避免，救火英雄亦唔會枉死。

當局話要加強消防員培訓，計劃喺將軍澳興建新嘅消防訓練學校喎。咪話太一叮唔點醒政府，正所謂「朝廷不養餓兵」，如果唔解決資源問題，唔更換啲老爺設備，要消防員繼續搵命博，就算新校起好亦未必有人敢報名，到時咪盞養蚊。叮！