01/04/2010

播放本新聞相關短片

政情:Bunny識歎 潮州烚魚當飯食

身為潮州人嘅青年事務委員會主席Bunny陳振彬,久唔久會心思思想食家鄉潮州菜,呢日佢專登貢去上環嘅「潮州會館」歎家鄉蒸蟹。

潮州凍蟹一向出色,原來蒸蟹都不遑多讓,佢柯打時令肉蟹,煮法原汁原味,清蒸上碟,已是蟹香四溢,蟹身足有兩隻手掌咁大,但肉質唔老,反而又嫩又甜。

佢話潮州人愛食海鮮同靠近海邊有關,食魚平過食飯,所以潮州人會將烚魚當飯食,佢點咗一味魚飯,拌以普寧豆醬,鮮味提升百倍。大家咪畀魚飯個名呃咗,廚師將魚拆肉上碟,啖啖肉。潮州人烚魚有妙方,嗰煲水好少更換,完全吸收晒魚肉精華,經過呢煲千年魚湯煮一煮,神仙都企唔穩。