自從立法會議員卿姐劉慧卿同白鴿黨「結婚」之後，黨內原有嗰班男議員就好似志雲大師咁，生活起咗啲變化，包括開黨團會議嚴禁無故遲到，否則就要罰錢，又唔可以好似以前咁喺會上爆粗同講有味笑話，議會生活枯燥咗好多。
不過，班白鴿仔並冇因而覺得好驚、好亂或者諗過放棄，反而成日有意無意飛甩卿姐，大搞「男士之夜」盡訴心中情，重溫吓過去十幾年全男班開黨團，乜嘢衰嘢都講得出口嘅光景。
通常最方便係喺立法會禮拜三開大會，因為當晚佢哋一定唔會約人食晚飯，一旦當日大會冇乜議程提早落堂，「高達」李永達、張文光、涂謹申同甘乃威等幾隻鐵腳，就會好有默契咁等埋一齊食飯消夜，將平日講到嘴邊都要收番嘅粗口同鹹濕嘢一次過噏番晒出嚟，互相「分享」同交流吓。
至於邊個白鴿仔講得最多、最「專業」？據聞講有味笑話講得最好笑最到肉嘅就首推「肥仔明」李華明，爆粗爆得最流利同詞彙最廣嘅係高達，私底下鬥爛口未必會輸畀辭咗職嘅社民連三子。