一國兩制研究中心尋晚搞咗個晚宴，慶祝《基本法》頒布二十周年，筵開十幾席，邀請城中百幾位名人出席。身為研究中心理事會主席嘅行會召集人CY梁振英當然有出席，署理行政長官「唐唐」唐英年都有份主禮。兩個疑似下屆特首參選人同場，疑似競爭對手喎，有冇擦出火花先？
殊不知佢兩個喺台上不時咬耳仔，喺中聯辦主任彭清華致辭時，同樣坐喺台上嘅CY同唐唐更加傾個不亦樂乎，有時仲相視而笑，兩個都係四萬咁嘅口，睇唔出有半點芥蒂。
點知十幾位主禮嘉賓齊齊上台祝酒嗰陣，準備由左邊上台嘅禮儀小姐，一個唔小心整跌咗托盤上嘅香檳，搞到遍地玻璃碎，工作人員連忙執番好啲嘢同換過批新嘅，台上眾人就繼續儀式當冇嘢。不過，發生咁嘅事認真唔老利，莫非意味着嚟緊嘅特首選舉會令大家跌晒眼鏡，搞到滿地玻璃碎？