身兼行政會議成員嘅鄉議局主席劉皇發，佢同家族成員有份嘅兩間公司、包括嘉忠投資有限公司，早前斥資逾八千萬元大舉掃咗元朗YOHO MIDTOWN二十四伙，仲被傳買入單位無耐，就以摸貨（確認人身份）形式沽出兩個單位，帳面獲利逾一成。
行會成員買賣物業，尤其涉及炒賣，一向敏感。翻查行會申報紀錄，佢最近一次利益申報係喺上年七月，即係呢二十四伙交易冇顯示到出嚟，難怪惹嚟疑竇。
發叔尋日就話佢確實係兩間公司嘅董事，但今次MIDTOWN單位，全部都係大仔劉業強搞，佢事前唔知情，但事件曝光後，佢已經審過個仔，個仔實牙實齒話冇摸售MIDTOWN單位，發叔話：「斷估個仔唔會呃我嘅！」
佢又解釋話今次嘅買賣未做契，未使向行會申報，但政府講緊壓抑樓價，自己身為行會成員，又點會炒樓？都係嗰句，坐得行會個位，行事當然要審慎至上，正所謂瓜田李下，惹人閒話就唔好喇！