講咗咁耐，煲呔曾尋日卒之宣布成立港台經濟文化合作協進會（協進會），話要為香港同台灣構建合作新框架喎，但係一睇份成員委任名單，就知佢又喺度搞政治分餅仔大食會。
好似喺協進會下面嘅香港—台灣商貿合作委員會，揸旗嗰個係全國政協委員李大壯，佢喺香港政壇本來名不見經傳，但係經歷富貴黨○八年分裂一役，始為人注意。本身係新大中集團執行主席嘅佢係張學良後人，長期游走於兩岸三地，所以搵佢幫手參與港台交流工作係情理之中，但睇番委員會十五名成員中，喺政商界比佢更具聲名或更有家族背景嘅大有人在，秤起上嚟都未必輸畀李大壯喎，究竟佢有乜把炮坐呢個位呢？
有消息話，李大壯坐到呢個位主要因為佢係中央政府、台灣同香港特區政府三方面都能接受嘅人物。話雖如此，仲記得富貴黨喺○八年立法會選舉重挫後內部紛亂四起，繼而「3L」出走導致分裂，李大壯喺整件事中關鍵角色，居功不少。眾所周知，煲呔曾一向想搞散富貴黨，依家對李大壯委以重任，唔通係時候論功行賞？