阿王寸爆斥可恥

話說尋日喺立法會討論最低工資條例草案委員會嘅會議上，廿蚊張提問，話依家飲食業好多時都出大細糧，即係話雖然僱員係月薪計，但就分兩次出糧，咁半份糧除番小時，咁會唔會喺最低工資水平唔達標？

嗱！大家要留意，佢提出呢個問題已經好小心，既完全冇提及最低工資水平幾多錢，當然冇出現任何銀碼，咁忍口無非都係唔想又再引火自焚啫，但係都難逃一劫。

工聯會嘅「阿王」王國興好似上身咁，連珠炮發咁話最重要係養到自己，自己都食唔飽，養多個人都養唔到，話之佢大細糧吖！最低工資水平起碼要訂喺養得到自己嘅人工水平。佢仲話，講句唔好聽，連繁殖後代都做唔到，社會好可悲同好可恥，就會導致激烈對立嘅情況，營商環境都唔好，凡係有遠見同社會責任嘅老闆都唔會咁諗。

以平時廿蚊張一貫寸寸貢嘅嘴臉，睇到阿王擺明喺度寸自己，初時都沉得住氣，話阿王有啲誤會佢嘅說話，但講多兩句又有啲故態復萌，話大細糧係業界幾十年一直用嘅行規，無論大家鍾意又好，唔鍾意又好，都係咁o架嘞！

無端端又畀人噴，廿蚊張梗係唔高興，但要怪嘅就只怪自己！邊個叫佢之前搞鋪杰嘅，仲周圍點慶着全城吖！一日立法會未審完條例草案，佢伸個頭出嚟講嘢，肯定都畀人鬧爆，總之就有排佢受喇。