小白觀點：輕判停牌緩刑離晒譜
公立醫院醫療事故多到嚇死人，好多人認為私家醫院會有保障得多，查實天下醫生一樣黑。呢嗱，繼有孕婦剖腹產子血崩死咗，依家又有個投訴，有位女士話去某間私院睇婦科，醫生診斷完百分百肯定佢肚裏嘅BB唔得，仲要快快當日就刮宮刮走去，好彩呢位準媽媽冇聽咋，依家個小朋友三歲幾，仲肥肥白白不知幾咁可愛！
小白老弟唔懂醫，好難評論呢個醫生嘅專業有冇出錯，但據醫委會講呢件係嚴重失誤，按道理，差啲殺死BB呢條罪，應該肯定唔輕啦。點知醫委會輕判停牌三個月仲緩刑一年，嘩，有冇搞錯呀，咁即係呢個醫生仍然有資格周圍搵人刮宮啦。
呢啲咁嘅例子，係外國大把，所以奧巴馬醫改有咁多人嘈，其中一個原因係怕全民醫保最終只會益咗醫生，為咗搵錢做埋啲不必要嘅手術，感冒頭暈都開刀Check Check，出咗事就醫醫相衞，問你驚唔驚！
e-mail：sunsiupak@gmail.com
Blog：http://sunsiupak.blogspot.com
阿豪觀點：搵周一鑊操刀都嘥氣
有孕婦喺私家醫院生仔，醫院開頭勸佢刮宮刮走個BB，好彩準媽媽冇聽到咋，依家個小朋友三歲幾，你話咁做醫生法，病人真係多得佢唔少啦！
呢單嘢真係有警世意義。第一，家陣睇醫生已經發展到好似去街市買菜，要貨比三家。更不堪嘅係，買餸貨比三家，都係諗住搵間最平最抵買嘅，斷估唔會怕其中一間賣殘餘農藥菜，另一間有孔雀石綠！睇醫生就唔同啦，分分鐘可以靠害搞出人命㗎。
呢個故事嘅第二個啟示，就係其實好多醫療失誤，喺醫生專業範疇裏面，其實係一字咁顯淺嘅事。事主好彩有個做實習醫生嘅朋友，諮詢吓佢意見，人哋一睇就知刮宮冇乜迫切性，勸佢哋再Check多次，事後證明真係有人做錯嘢。所以話啫，醫生最緊要都係上唔上心，唔上心嘅話，就算周一鑊親自同你操刀都嘥氣啦！
e-mail：lukchiho75@hotmail.com
Blog：http://lukchiho.blogspot.com
網友觀點……
狒 狒：醫院事故有增冇減，似係醫者冇責任心多過父母心。
羅 拔：連醫生都信唔過，依家做人真係冇乜安全感！
阿 水：人命攸關，醫療事故不可一，不可再！
可 可：係咪依家啲醫生水皮啲呢，差唔多日日有一單。
有料爆：
高考生被考評局玩殘，冇仇報認真慘。
SMS傾埋一份：6016 2496