可惜政府淨係識齋噏，對家庭暴力受害人嘅支援不嬲到喉唔到肺。嗱，社署尋日公布將喺今年六月份推行「家庭暴力受害人支援計劃」，資助民間機構向受害人提供法律諮詢、情緒支援及輔導服務。

社署署長聶德權乘機吹水，話當局一直致力打擊家庭暴力，不斷投放新嘅資源，進一步加強對受害人及有需要家庭提供有關服務咁話。點知計劃一公布，就被業界狂批，話支援名額太少，幫唔到所有受害人。

又難怪人哋咁嬲嘅，今時今日，本港家庭暴力愈演愈烈，淨係去年，全港就發生四千八百幾單虐待配偶個案，平均每日十幾單，虐待兒童個案就有九百九十幾單，比去年增加一成二。淨係呢兩項，就有近六千幾個受害者，但政府每年只係撥款五百萬元，有關服務只可以支援八百人咁大把，直情係杯水車薪。

其實，早喺○六年，就有婦女團體提出家暴受害者需要支援，但係政府拖咗足足四年都冇做嘢。依家冇辦法再拖嘞，又做啲唔做啲，搞到唔湯唔水，你話業界有乜法子唔嬲吖。

最令人閉翳嘅係，因為政府翹埋對手唔做嘢，近年家庭暴力有增無減。一場金融海嘯，不知幾多打工仔被裁員減薪，搞到家嘈屋閉。正所謂貧賤夫妻百事哀，喺外面受咗氣，返屋企就攞老婆仔女出氣。家陣海嘯餘波猶在，未來幾年家暴受害個案一定會愈嚟愈多。政府嘅袖珍支援計劃，根本止唔到咳。叮！

講真，政府對家庭暴力的確係頭痛醫頭，腳痛醫腳。仲好似一碌四方木咁，人哋推一下先至郁一郁。呢，早幾年，天水圍連續揭發家暴事件，直情變咗悲情城市。傳媒踢爆後，政府先至做嘢，成班高官湧晒去，起勢做親民騷。等到件事丟淡咗，所有嘢又打回原形。另外，正如業界人士話齋，政府冇及早介入預防家庭暴力同埋保障兒童，等到出咗事先至提供支援已經太遲。兒童受虐待，影響一生幸福，絕對唔可以當兒戲。

一句講到尾，家庭暴力唔係小事，咪以為兩公婆打交係耍花槍，床頭爭床尾和，其實好多人就係咁冇咗條命。遠嘅唔講，就講早排何文田嗰單倫常悲劇，老婆懷疑老公包二奶，兩公婆拗到火遮眼，老公用菜刀砍死老婆，然後跳樓。

人命關天，絕對唔可以掉以輕心，如果政府仲係一味做事後諸葛亮，提供支援又到喉唔到肺，唔知仲要死幾多人。叮！