內地孤苦無依嘅老人為數唔少，英皇集團主席楊受成日前伸出援手，捐出一百五十萬元人民幣推動內地關愛老人計劃，包括喺河北省雄州縣興建「楊受成慈善基金（雄州）老年服務中心」，並加碼支持旗下喺河北順平縣老年服務中心嘅收容無依老人計劃。楊主席上禮拜三喺英皇集團總部，將巨額支票移交河北省保定市人民政府代表，細仔楊政龍亦有份陪爸爸做善事。
呢筆善款將分成兩部分，當中一百萬元將用作興建雄州老年服務中心，為當地孤寡老人提供二百四十個床位，餘下五十萬元就用於支持順平縣嘅「楊受成慈善基金（順平）老年服務中心」，為無工作能力、無固定收入同無子女供養嘅「三無」老人提供收容同善終服務，等老人家安享晚年。過去幾年，楊主席除咗喺河北省興建兩所老人服務中心，亦合共捐出超過一千二百萬元人民幣畀湖北省慈善總會。