近年港府多個保育計劃都備受爭議，尋日立法會發展事務委員會討論保育計劃時，議員質疑港府缺乏保育項目嘅既定準則，搞到有啲項目有津貼、有啲項目又零資助，發展局局長林鄭月娥直認：「唔排除多啲保育經驗之後，（我哋嘅）準則會再細化。」林鄭咁講，等於承認家吓係冇準則嘅，保育大計點推行可以話係任政府官員講！
白鴿黨嘅甘乃威尋日喺個會上問，政府宣布用三億元維修美化荷李活道前警察宿舍，以推行活化；但虎豹別墅就冇資助，質疑當局嘅準則何在？點樣估算？林鄭話主要視乎項目有冇商業契機，或政府有冇特定目的，以荷李活道前警察宿舍為例，會用嚟支持本地文化創意產業，但就唔會租畀名店；而虎豹別墅有足夠商機，唔會一面倒推文化藝術。
雖然每個項目唔同，但保育嘅大前提冇變，如果政府冇一套清晰準則，會令參加保育計劃嘅持份者、用家好混亂，好似一場冇球例嘅球賽，即使林鄭喺個場中不停吹雞，但踢波嘅人唔知規矩點定，盞混戰一場啫！有議員亦質疑永利街忽然全部保育，小業主擔心樓價大跌，林鄭承認形勢一直在變化，下階段市區更新計劃時，政府會聽多啲地區意見。