強制性公積金計劃管理局行政總監陳唐芷青最近冧莊，任期加多三年至二○一三年，唔少人都知佢係金管局總裁攞命陳嘅太太，原來積金局仲有另一個陳太，就係積金局對外事務部主管陳利碧衡嘞，尋日兩個陳太一齊行街街，一聲陳太真係唔知嗌邊個，搞到主管外事嘅陳利氏要笑笑口咁話︰「唔好搞錯呀，佢至係『真』陳太呀﹗」
執掌積金局後，陳唐芷青嘅知名度愈嚟愈響，遲啲佢仲會粉墨登場，事關佢係女童軍副會長，下月二十五號嘅禁毒大匯演，佢會同其他名媛女童軍一齊做舞台劇，宣揚禁毒訊息，而且仲會開金口唱歌添。由於今次係做一個禁毒劇，所以陳太唔使點角色扮演，只要做番自己勉勵吓啲後生就得。
