內地西南多個省同地區鬧旱災，雲南、貴州、四川、廣西壯族自治區同重慶市嘅降雨量，只有平均年雨量嘅一半，水貴如油情況重現。香港人未必個個感同身受，不過小母牛愛心大使伏明霞就話，水資源係好重要，必須好好愛護，佢平時都積極同大女司渝、二仔皓嘉及就嚟兩歲嘅細仔James灌輸環保慳水之道，除咗教佢哋要慳啲「洗」之外，佢自己亦身體力行做到足。
好似尋日佢出席活動前，先幫James沖涼，沖涼啲水都冇嘥，攞嚟拖埋浴室塊地。小伏咁樣言教身教，小朋友一定識得珍惜用水。
小伏喺個活動上接受合和實業董事總經理胡文新捐款三十萬元，之後不忘介紹小母牛嘅活動宗旨，話佢哋除咗向有需要嘅人送禮物之外，仲有教農戶儲水。
