近期有報道話，范太喺兩會期間已經見過港澳辦負責人，仲話佢同官方代表講，只要國家支持佢同需要佢，佢就會參選特首為香港人服務；更有報道引述政界人士話若然煲呔曾中途下台，范太好樂意臨危受命上陣，仲唔介意解決煲呔曾搞唔掂嘅二十三條立法同普選路線圖等。

范太尋日話唔明點解同一個傳聞每隔幾個月就出現一次，指自己「冇做過啲乜嘢」令呢啲謠言不斷出現，佢強調自己已經年紀大、唔夠精力，而特首呢個位太辛苦，全年無休，應該要留番畀後生啲嘅人去做，自己從來都冇參選嘅念頭。至於報道話佢見過中央官員，范太更加咬牙切齒咁澄清，冇任何中央官員就特首一事接觸過佢，亦冇任何當權人士向佢提過希望佢做特首，佢自己更加冇表達過對特首一職有興趣，希望呢個傳聞可以停止。

雖然范太冇直接回應選特首嘅傳聞有冇令佢感到困擾，但就認為每隔一段時間就要重複同一個答案，實在太冇意思，所以決定封嘴，以後都唔再回應呢個問題，希望大家唔好再擺佢上枱。被問到會唔會好似疑似特首候選人、行政會議召集人梁振英（CY）咁講「N屆都唔選」嚟表達心迹，范太就笑笑口咁話佢有自己嘅風格，唔需要學CY講嘢。