鬍鬚曾二月底公布預算案之後，港大嘅民調發現仲有四成七受訪者表示滿意，隔咗一個月，持滿意態度嘅受訪者已經減至三成半；而話唔滿意嘅受訪者多咗十六個百分點。受訪者最唔滿意嘅兩項政策係樓市同財富分配，分別有六成半受訪者認為預算案嘅建議唔可以穩定樓市，同埋喺財富分配嘅比率不公。同時都有五成七受訪者唔滿意預算案喺穩固復甦、發展經濟同埋關愛社會嘅表現。

唔識理財 兼被地產商睇穿

雖然負責調查嘅鍾庭耀解釋，過去同類型嘅調查都顯示，第三輪嘅結果往往較首輪調查出現滿意度減退嘅現象，不過鬍鬚曾今次表現插水嘅程度又真係好犀利，尤其樓價不斷上升，好多冇辦法上車嘅冇殼蝸牛對政府嘅表現更失望，貧富懸殊累積嘅社會怨氣愈嚟愈多。

下個月十四至十五號，立法會議員就會就預算案發言，然後喺二十一號表決。鬍鬚曾份預算案冇長遠策略已經遭到諸多批評，或者係咁，佢嘅個人民望只得五十三點七分，距離合格線愈嚟愈近，再拖落去，評分同民望愈插愈深，鬍鬚曾真係食定驚風散去立法會都唔掂！

有學者批評，鬍鬚曾過去兩份預算案嘅評分一次比一次低，反映佢唔識經濟、唔識理財。至於穩定樓市方面，政府招招無力，反而被地產商睇穿患上「八萬五恐懼症」，所以小市民對預算案咪愈睇愈嬲、亦愈睇愈失望囉。