小白觀點：弱雞政府賠錢賠到手軟
人起高鐵，香港起高鐵，點解會起到天怒人怨o架？
之前「80後」搞嘅反高鐵行動，已經令到呢個政府好頭痕，依家荃灣五條村嘅原居民接力，話高鐵工程計劃貫穿村落地底，極有可能會破壞風水龍脈，有乜事幹入晒當局數咁話。唉，睇吓內地政府收地拆屋幾咁強勢吖，就算插住國旗，照樣夷為平地，邊度有人夠膽出句聲㗎，由此證明煲呔曾呢個唔止係弱勢政府，直頭係弱雞政府！
話時話，風水呢家嘢信則有，不信則無，大家有冇睇過衞斯理嗰本科幻小說《風水》？入面話成個風水格局係命運共同體，唔止影響一兩條村咁簡單，壞咗一條龍脈，後果可大可小㗎，隨時爆多鑊文化大革命都有之呀！所以呢，只要高鐵一動工，以後投資有乜損手爛腳，或者頭暈身熱，唔向弱雞政府索償就笨囉！
e-mail：sunsiupak@gmail.com
Blog：http://sunsiupak.blogspot.com
阿豪觀點：風水應成港第七大產業
廣深港高鐵嘅廣深段將會喺今年十月二十八號通車，預計每程只需25分鐘，到時就淨係得番香港嗰橛未搞掂。唉，人哋內地基建劍及履及如火如荼，反觀香港就好事多磨，大家話嘞，香港段高鐵要搞到幾時先通到車呢？
呢嗱，果然出事嘞，由於高鐵工程計劃穿過荃灣區五條原居民村落嘅地底，有村民擔心工程會影響風水龍脈，已經請咗風水師評估工程影響，睇個勢，一於要同當局撐到行。
呢單嘢嘅發展唔知會點，但對香港嘅風水業就一定係件好事。香港雖然話係國際大都會，但係風水玄學經常成為大家嘅關注焦點，之前有風水遺囑，家陣又有風水鐵路。計我話，香港連百年老字號嘅藥廠都出事，與其搞埋晒啲乜嘢檢測及認證產業，倒不如將本港風水業發展成為第七大產業，咁仲實際啦！
e-mail：lukchiho75@hotmail.com
Blog：http://lukchiho.blogspot.com
網友觀點……
河 蟹：想快啲完工？減少無謂嘅爭拗咪得囉！
周 仔：唔知幾時又有人出嚟玩反對呢？遲早搞到爛尾！
八 哥：施工愈耐成本愈高，到時蝕本又要調整票價。
吹水阿伯：班「30後」睇嚟好難等到搭高鐵返家鄉呢一日。
有料爆：
冇錢出埠，勁撐復活節留港消費！
SMS傾埋一份：6016 2496