在家千日好，出門事事難。內地生離鄉背井嚟香港讀書，遇到嘅困難必然多過本地生，如果得唔到適當嘅輔導支援，好容易心灰意冷，過去九年，香港已經有五個內地生自殺身亡，當局係咪應該好好檢討吓呢？

其實，莫講話情緒支援不足，就算學生宿位咁簡單嘅事，本港大學都無法滿足內地生嘅需要。以香港現時提供嘅學位計，莫講話對外招生，就算本地生嘅大學入學率都遠遠落後其他發達地區。

高官下巴輕輕，以為撥幾塊地皮，鼓勵私人辦學就叫做教育產業。問題係，私人大學點樣搞、點樣保證辦學質素，完全冇人知，到時如果搞成野雞大學，教育產業淪為「教育慘業」，咁就好笑喇，叮！

講到底，香港雖然有幾間國際排名唔錯嘅大學，但都係公營嘅，而且吸引力始終不如英美嘅傳統名校。港府鼓吹私人辦學，學費貴好難吸引外來學生，學費平又影響辦學質素，到底有幾多內地學生願意來港就讀呀？

俗語話，萬丈高樓從地起，想搞好高等教育，必須打好中小學嘅基礎。但係大家都知，近年香港嘅教育政策朝令夕改，淨係教學語言就改來改去，一時母語教學，一時上落車，一時又微調，改到家長學生無所適從。最近，當局又推出一個「自願縮班計劃」，搞到老師人人自危，當局連基礎教育都搞唔掂，又點樣發展教育產業吖？

學教育界人士話齋，教育嘅目的係作育英才，唔係一盤生意，當局將教育當成產業嚟搞，根本係本末倒置。講多無謂，食多會滯，太一叮奉勸高官腳踏實地，專心搞好本地教育，唔好再吹水唔抹嘴，叮！