老牌中成藥畀新加坡踢爆有西藥成分，藥廠好學唔學，走去學埋特衰政府嗰套門面工夫，委託大學中醫藥研究所檢討品質監控制度，又話要成立一個管治委員會跟進回收機制，另外再加一個諮詢小組，邀請業內專業人士提供品質監控、風險管理同企業管治文化等意見。喂，小市民淨係想知屋企食剩嗰幾盒成藥換唔換得番錢啫，使唔使咁誇張呀？

計我話，不如將層次再提升一級，學豐田社長豐田章男嗰套「麻婆豆腐論」，話成藥係由病人創造出嚟，中國、美國、日本、香港嘅使用環境好唔同，就好似食麻婆豆腐咁，喺中國食、喺日本食、喺美國食、喺香港食都叫麻婆豆腐，但味道好唔同。亦即係話，鬼叫香港特區政府冇監冇管咩，遲早麻婆豆腐驗出有「酚酞」同埋「西布曲明」，一啲都唔出奇呀！

e-mail：sunsiupak@gmail.com

Blog：http://sunsiupak.blogspot.com

阿豪觀點：靠食安中心不如自救

又有中成藥出事，今次嗰隻係大家經常會服食嘅老字號品牌，仲check到有致癌成分添。成藥出事唔係咩新聞，之前都唔知發生過幾多次類似事件啦，但衰就衰在，今次據講出事藥廠一月就發現有問題，但係就冚埋冚埋，唔報畀衞生署知，直到新加坡話回收嘞，衞生署至識跟進。

不過咁，港府後知後覺、冇厘醒目，都唔係咩新聞吖，大家記唔記得呀，之前內地雞蛋製品被揭發含三聚氰胺，咪一樣係韓國同日本相繼驗出有問題後，我哋個食物安全中心先至check到出嚟，市民靠香港班官，不如自己多啲上網睇吓國際新聞好過。

吖，唔知係咪煲呔曾自己都覺得「土炮」唔掂，當年至會一意孤行搞隊「八國聯軍」副局政助出嚟呢？佢會唔會其實係一片好心，只係一心想改善施政，而我哋怪錯咗佢呢？

e-mail：lukchiho75@hotmail.com

Blog：http://lukchiho.blogspot.com

網友觀點……

食錯藥：衞生署梗係認為老字號靠得住，咪懶得去抽驗囉。

大　夫：睇嚟新加坡當局做嘢較香港衞生署認真得多喎！

周　仔：老牌藥廠都會隱瞞問題藥，其他更不在話下啦！

阿　水：成藥信唔過，有病都係搵醫生穩陣啲！

有料爆：

咁多內地生自殺，特府轉搞自殺教育產業啱啲。

SMS傾埋一份：6016 2496