報道話老董此行係私人性質，具體行程由佢喺台灣嘅妹夫、中國航運公司董事長彭蔭剛安排，仲話首站拜會咗佢喺高雄嘅洪姓親家，又去咗佢家族企業東方海外航運喺當地承租嘅一個碼頭視察，跟住會喺台南逗留兩日，再上番台北。報道指成個行程未有安排同台灣政府官員會面，只會同國民黨榮譽主席連戰食餐飯，抵台時又冇用特別通道或受到額外禮遇。

老董尋日抵埗高雄小港機場時被傳媒「撞破」，記者問佢今次訪問嘅詳情，老董只係答咗一句：「私人訪問，不要驚動大家。」訪台之行被踢爆後，老董傍晚惟有發表聲明，自言十幾年冇去過台灣，此行主要係探望喺高雄嘅親家同喺台北定居嘅妹妹同妹夫。