尋日佢哋拍住出席一個電台節目，主持人介紹時，稱呼「好打得嘅林鄭月娥同應該好打得嘅張震遠」，林鄭一聽，即刻插嘴話張震遠比佢更打得，但就冇解釋點解。佢哋兩個合作多時，馬頭圍道冧樓之後，張震遠第一時間走出嚟幫林鄭解圍，孭起重建馬頭圍嘅工作，已經見到佢哋嘅默契，尋日更可見佢哋互相補位。

張震遠同林鄭好似夾定咁一再話永利街保育同強拍無關，又話政府好早以前已經諗住保育，並唔係用永利街嚟遮擋強拍公告遇到嘅障礙，張震遠仲話：「我哋唔係好蠢，但亦冇咁聰明……我哋比較唔係咁蠱惑，諗到咁多嘅計！」轉過頭，林鄭又話：「我哋係老實嘅公職人員，冇呢個政治敏感度」，政府「冇咁聰明、冇咁蠱惑，亦冇咁嘅需要」咁做，呢對老拍檔每一招都封到密不透風，睇怕大話都講到變真嘅一樣。問題係，佢哋講嚟講去，點解市民仲係唔信嘅呢？