風之后李麗珊同老公黃德森生咗兩個女，當年珊珊一句「養育一個細路要花四百萬元」成為唔少人嘅避孕金句。今時今日兩個女有排都未夠十八歲，距離埋單計數仲好遠，不過黃德森日前就話，養兒育女係要使錢，但父母投入嘅心力更加多。
珊珊同黃德森呢對體壇名人都好緊張兩個女，更認為身教重於言教，黃德森上禮拜出席單車名將黃金寶獲教院頒授榮譽院士銜典禮時話，學校無論教得點好，都唔及父母嘅貼身教育，所以佢哋兩公婆一得閒就會搞親子活動，好似湊兩個囡囡去親親大自然，等兩個囡囡可以從中學習科學知識。咁勤力做囡囡嘅「老師」，難怪黃德森話錢銀呢啲有形嘢都仲計到，但點都唔及父母難以估量嘅心血啦。
○八奧運嗰年，珊珊即使忙住為亞視奧運節目做主持，但一樣冇忘記幫個女報讀暑期班，家吓做全職媽咪，睇怕更加瞓身都似。