明愛家庭服務中心尋日請咗行會召集人梁振英（CY）同一班中產人士分享快樂之道，點知CY一再離題，由六、七十年代嘅香港講到近期嘅最低工資爭議，連司儀都忍唔住問佢如果做到特首，會點處理呢啲問題呢？CY今次冇迴避，仲話會重新向大家解釋功能組別嘅真正意義，更暗寸因為最低工資成眾矢之的嘅張宇人，話功能組別選出嚟嘅議員唔係只代表佢哋業界利益。
司儀之後再問CY，如果畀佢揀「放下」一啲嘢，佢會放棄啲咩呢？CY再次扯到冇雷公咁遠，批評港英政府冇喺香港回歸前制訂長遠政策，喺醫療融資、退休保障同空氣污染等議題上交白卷，令香港發展停滯不前。佢又暗寸煲呔曾政府，話社會上冇一個議題係冇爭議性嘅，「一提出嚟實畀人鬧」，但政府唔應該因此縮沙，應該有美國總統奧巴馬推行醫改時嘅勇氣，否則香港往後嘅幾代人仍然會面對一樣嘅問題喎。用佢嘅說話講，即係依家係時候為香港制訂一啲長遠啲嘅政策。
呢排見親CY都聽佢講遠景，其實佢早喺香港回歸後過渡期已參與討論香港事務，回歸後做咗行會成員，一做十三年，佢依家先至嚟講長遠規劃，若非為選特首，就係遲來的勇氣、遲來的反省！