富貴黨想輸入新血多時，早排更搞咗個每個常委各自招募五個新人入黨嘅計劃，希望藉此力抗分裂出去嘅經濟動力。招募限期據講月底屆滿，佢哋仲自己定咗個小懲罰，如果常委跑唔夠數，就要自掏腰包請其他人食飯，算係對勤力常委嘅一項獎賞。據講，有常委原本已搵齊人頭，坐定粒六等人哋請食飯，點知廿蚊張突然發表偉論，辣㷫全城，令唔少原本應承入黨嘅準新秀都縮沙，有啲唔認數，費事畀市民以為佢同廿蚊張同夥；有啲就押後計劃，搞到負責搵人嘅常委都唔好意思，寧願拎錢出嚟請人食飯算數。

Miriam否認現退黨潮

本身冇乜興趣搵人入黨嘅常委利用廿蚊張事件，作為跑唔到數嘅藉口，費事惹事上身，又係嗰句，破財擋災好過i爛面兼出賣人情拉新丁。喺個個褪軚之下，富貴黨呢個新嘅輸血計劃睇怕要胎死腹中。

咁都未算，近排有啲政圈風吹草動話廿蚊張令富貴黨湧現退黨潮添，黨主席Miriam劉健儀已經否認咗。不過，一個黨要有活力、要向上流，必須要有接班人，依家富貴黨畀廿蚊張搞到愈嚟愈麻煩，呢場仗肯定更加難打！