教育局尋日宣布推出「自願優化班級結構」計劃，鼓勵參與嘅學校自願減班，譬如將五班中一減到四班。教育局局長孫明揚話，計劃除咗可以提升教學質素外，亦可以提供誘因，等學生自然分布到其他學校，紓緩收生不足問題。當局會提供五年過渡期，學校可以保留原先編制人手，等教師自然流失。佢仲強調，並冇殺校嘅政策，問題主要係人口下降，學校收唔到足夠學生。

好咯，唔係殺校，一天都光晒。不過咁，計劃屬於自願性質，即係話，參唔參加悉隨尊便。而提到「自願」，就好易令人諗起嗰個虎頭蛇尾嘅「校園自願驗毒計劃」，所謂自願減班，到時可能又係有姿勢冇實際。

呢嗱，雖然有學校話支持計劃，但亦有唔少學校話無興趣減班，尤其係名校，更加睬你都儍。睇嚟，問題絕對唔係當局想像嘅咁簡單。咁又係嘅，人哋名校個個學生打崩頭爭住入讀，根本唔憂收生，點解要減班喎？

所以話，喺呢個計劃之下，收生不足嘅學校根本攞唔到乜嘢着數，道理一字咁淺，名校唔肯減班，佢哋照樣收唔到足夠學生，可能殺得仲快添。唔怪得教育局回應有關政策會唔會加深標籤效應，幫唔幫到弱勢學校時，咿咿哦哦，顧左右而言他啦。

叮！一廂情願嘅「優化」其實係唔化。既治唔到標，更治唔到本，解決唔到問題不特止，直頭添煩添亂。正如有家長批評，措施影響咗仔女選擇入讀名校嘅機會。亦有人指港府太孤寒，學校每減一班，就會有兩個超額教師，但教育局每年增加嘅資助得二十五萬咁大把，只夠請番一個新入職學位教師，你話學校又點會積極參與吖？

唉，本港教育政策愈來愈無厘頭，搞到學校、家長、學生愈來愈無所適從。中一收生數量已經連跌九年，收生人數將會由下學年嘅六萬幾人，遞減到五年後嘅五萬幾人，有學校因收生不足撐唔落去，係大勢所趨，就算當局崩口人忌崩口碗唔用個「殺」字，部分學校最終亦難逃殺校厄運。

計太一叮話齋，自願減班不過係敷衍市民嘅權宜之計，止唔到咳，優化班級不如優化教育，只有善用資源提高教學水平，增加吸引力，學校至辦得落去。唔好忘記，學校培養嘅係人才，唔係白老鼠。叮！