小白觀點：時薪兩萬大把人爭住做
下次去飲茶真係要小心啲，飲嘅茶葉、食嘅點心，大家固然有晒心理準備隨時係偽冒劣貨，依家連部長都可能係假，拎咗你張信用卡去埋單，埋到影都冇埋，原來呢位西裝友已經喺隔籬碌緊卡。所以志雲大師確係當今最偉大嘅哲學家，一句「真的假不了，假的真不了」，道出咗世間萬物嘅虛空本質。
有朋友問，冇理由有個A貨部長喺度，其他員工冇人發覺㗎？問得呢個問題嘅人，肯定唔知依家飲食業界幾咁陰功，一個人閒閒哋要服務十幾二十張枱，真係得閒死唔得閒病，仲邊有精神分辨邊個真客邊個假客吖。
不過小白老弟有啲擔心，你知啦，張宇人話從事餐飲業嘅最低工資只係得二十蚊，但聽講話呢個假部長唔夠一粒鐘就碌走兩萬，咁好搵，難保有日成間酒樓冇個係真部長。
Email：sunsiupak@gmail.com
Blog：http://sunsiupak.blogspot.com
阿豪觀點：名牌應加防偽雷射標貼
依家個世界真係傻咗，連酒樓部長都有人扮，從而攞咗顧客嘅信用卡或現金，睇怕以後都係唔好亂咁爭住請客畀錢囉。
事發嘅酒樓隨即澄清，話佢哋旗下部長係有佩戴名牌嘅，咁嗰啲騙徒實會諗計啦：咦，係喎，下次準備工夫都係要仔細啲，千祈唔好漏整個名牌！睇嚟酒樓方面要整番個有雷射標貼等防偽特徵嘅名牌，再唔係不如索性效法警方咁樣，向員工發放委任狀囉。
不過諗深一層，始終都係顧客自己太容易信人喇，黑色西裝隨街都有得賣，不法之徒不費吹灰之力就扮到部長啦。呢嗱，大家不妨睇吓近日發生嘅一單「師奶智破電話騙徒黨」事件，嗰位婦人唔單止識穿對方詭計，更加好醒目咁暗中報警，幫警方將騙徒繩之於法。所以話呢，與其吓吓靠警方，不如自己多動腦筋好過！
Email：lukchiho75@hotmail.com
Blog：http://lukchiho.blogspot.com
網友觀點……
雞包仔：下次埋單都係要睇吓部長個職員證先畀錢。
茶客：騙徒咁好演技，唔去做戲嘥晒！
西裝友：喺酒樓着住老西，周時畀啲阿伯認錯係部長。
賓仔：避免損失，親自去埋單最穩陣。