收集心頭好係一種考驗耐力嘅嗜好，著名古物收藏家譚兆璋鍾意收集世界各地嘅地圖，至今已經二十幾年，依家佢嘅圖像藏量多達二十萬份，「地圖王」嘅美譽當之無愧。
除咗鍾意儲地圖外，佢仲好鍾意蒐集世界博覽會嘅展館銅版畫、會場地圖同紀念品。上海世博就快開幕，譚兆璋拉埋全國人大代表羅范椒芬，一齊成立香港各界支持上海世博聯合會，嚟緊會喺德福商場將佢多年嘅珍藏公諸同好，為五月舉行嘅世博造勢。
譚兆璋話原本只係鍾意收集唔同城市嘅古地圖，但由於舉行世博嘅永遠都係大城市，所以間接培養佢對世博收藏品嘅興趣。佢仲自爆話對世博收藏品嘅沉迷程度極高，已經去到「跟蹤性收藏」嘅地步，試過朝早收到call，下晝就即刻辦簽證，夜晚搭夜機去買佢嘅心頭好。