成功人士各有秘訣，身兼馬會大董嘅太古（中國）主席陳南祿（Philip）尋日返母校港大同學生分享，一向風趣嘅Philip歸納成功秘訣得二十個字，就係「老細英明，同事能幹，夥伴合作，顧客支持」，另外四個字則係「唔關我事」。
佢嘅意思即係話一切成功都要別人配合先可得到，同自己無關，做事唔自大，最少都贏咗人緣啦。佢又話大學一年級暑假，為咗填補自己未出過埠嘅遺憾，特登攞個海員牌去行船，結果一去四個月，連開學都遲到，但佢就眼界大開。
八九年佢畀太古派駐北京，當時佢連深圳都未去過，又唔識普通話，但都膽粗粗接受挑戰。上京後佢日日讀《人民日報》社論練普通話，搞到佢講嘢好有黨報風格。佢咁講都係想學生有勇氣、肯挑戰啫。