內地商人王征入股亞視嘅決心好堅定，已經喺大埔工業邨做亞視「義工」。佢早前接受內地周刊訪問講到未來大計，對於亞視兩大股東蔡衍明同查懋聲打緊官司，令佢入股一事亦受阻時，王征透露自己好有耐性等，仲話可以做兩、三年義工喎！
佢話，要將亞視打造成亞洲嘅CNN，唔係針對唐人街咁簡單，而係針對華爾街，準備開嘅普通話台暫名為「歡樂亞洲台」。官方新華社年初都推出咗國際衞星電視頻道，仲話要打造「中國CNN」，咁亞視咪同新華社打對台？王征話，一個係亞洲CNN，一個係中國CNN，已經唔同啦。
入股亞視嘅消息傳出後，王征個名響遍大江南北，佢話自己冇失敗過，預計五年內可扭轉亞視長年虧蝕嘅局面，有信心用二十年時間將亞視打造成功。