最低工資爭拗爆出立法會飲食界代表兼富貴黨副主席張宇人道歉事件，對「張廿蚊」本人、商界甚至富貴黨都帶嚟打擊，網民繼續鬧爆張廿蚊，話佢前言不對後語，令富貴黨丟架，不如辭職算數。幕後促成道歉事件嘅雖然係富貴黨前正、副主席田少同「莎姐」周梁淑怡，但據講田少睇完個記者會都擰晒頭，話道完歉都無補於事，因為張廿蚊應該就自己誤導公眾而道歉，但佢反而話公眾誤會佢。
言下之意，即係呢場道歉騷連田少呢個導演都唔收貨啦。幕後嘅田少同莎姐暗地裏想NG都冇用，記者會冇Take 2，張廿蚊講嘅嘢已經好似潑出去嘅水，冇得收番，張廿蚊成為乞打工仔憎嘅代表，最慘係事件都會影響富貴黨。
有該黨成員話主席劉健儀（Miriam）禮拜一霎時話要開記者會，之前黨內冇開會傾過，兩位副主席全不知情，畀Miriam拉去一齊出席記者會嘅方剛都唔知發生乜事。搞政治搞到冇商冇量，遲早會出事，個黨冇辦法凝聚起嚟，又點行落去呢？