立法會尋日下晝舉行特別財委會，議員喺勞工議題上紛紛質疑交通津貼擴大至十八區嘅建議一拖再拖，勞聯李鳳英、職工盟李卓人甚至工聯會嘅葉偉明等批評政府唔負責任，搞到低下層飽受車費昂貴之苦。

葉偉明形容張建宗係「歲月神偷」，因為「佢偷咗我哋唔少工人享有應得福利嘅時間」。英姐更忍唔住打斷張建宗嘅說話，要求佢畀個清晰時間表出嚟，希望張建宗講實年底研究完、幾時可以推出。

議員送禮物夠心思

張建宗一如以往咁遊花園，講親研究年底先完成時，重複「政府好有誠意、好認真、好細緻……」好似念咒咁，差在未講埋牙齒當金使。啲議員見佢冇答案，又批評政府一年前已經以拖字訣呃咗佢哋，今次點都唔肯再受騙。

啲議員一方面狠批張建宗，另一方面都準備咗好多有心思嘅物品，譬如馮檢基送咗兩架車畀佢，包括拖車，諷刺佢一直拖遲公布車津計劃；李卓人送咗啲菇畀佢，諷刺佢漚到車津呢個政策生埋菇都未推出；潘佩璆就話要送對耳塞畀佢，諷刺佢聽唔到民間嘅聲音。佢哋揶揄之餘又冷嘲熱諷，張建宗雖然滿載而歸，但棚牙都畀人剝咗啦，點笑得出呢？