唔係危言聳聽o架，呢，國際食品包裝協會數據顯示，內地每年消耗一次性餐盒（即係最常見嗰種白色發泡膠餐盒）一百五十億個，其中超過一半質量唔合格。咪以為淨係街邊無牌攤檔至用劣質嘅「黑心餐盒」，連京城嘅著名食肆都照用可也，正一係攞命無分貴賤。

檢測結果發現，呢啲餐盒含有工業碳酸鈣同工業石蠟，入面嘅致癌成分會影響人體代謝系統、造血系統、神經系統同消化系統，仲會蓄積毒性，誘發癌症添。如果長時間用呢類餐盒裝含有油同醋嘅食物，致癌成分不斷滲出，使用者等於吞咗三分一個餐盒所含嘅「隱形毒藥」落肚，你話同自殺有乜分別？

話時話，黑心餐盒咁恐怖，點解仲成行成市，全國氾濫嘅？講嚟講去又係錢作怪。用回收返嚟嘅工業廢料做劣質餐盒，同用正料生產優質餐盒，成本相差一半，利之所在，無良奸商梗係照博啦，話之你生癌，賺一筆至講。加上內地有關當局監管不嚴，更加肆無忌憚，依家全國餐盒廠商只有約一半屬於合法生產，問你驚未！

叮！食物含有毒物質由蘇丹紅、孔雀石綠到三聚氰胺，千奇百怪，依家連裝食物嘅餐盒都有事，而且影響廣泛，內地食品安全警報，呢幾年真係從未斷過。上個禮拜內地至爆出，由食肆剩飯剩餸土法提煉出嚟、含毒性相當於砒霜一百倍致癌物質黃麴霉素嘅「坑渠油」，全國每年「消費」高達三百萬噸，佔植物油消費總量十分之一，即係食十餐就有一餐有機會中招，咪講話食，諗起都作嘔啦。

瘦肉精、哮喘豬肉、三聚氰胺奶粉、坑渠油、黑心餐盒，內地食品安全醜聞唔止未停過，而且似乎同香港愈來愈接近添。嗱，好似坑渠油咁，冇幾遠嘅東莞就有唔少「煉油點」，啲油仲大量賣去香港一河之隔嘅深圳，睇怕唔少北上港人都曾經領過嘢。

好明顯，如果唔加強監控同防範，黑心產品隨時可能殺入香港，請問政府有關部門，你哋準備好未呀？

正所謂，唔怕一萬，最怕萬一。如果當局冇料到，唔主動出擊，防患於未然，獨沽一味靠中港食物安全通報機制，同現行嘅源頭管理及監察制度，自己翹埋手乜都唔做，到出咗事至騰晒雞補鑊，就好似呢次沙塵暴襲港咁，搞到亂晒龍，咁就乜都太遲咯。叮！