特區政府出咗名議而不決，乜嘢政策、大型基建冇番十年八載都唔使旨意推行得到。尋日立法會議員傾起中央屠宰嘅問題，食物及衞生局局長周一鑊又大耍太極，話依家仲做緊顧問研究，要等結果先決定。呢番話同佢哋○八年時不斷強調今年會起中央屠宰場嘅言論好唔同，擺明係轉軚，但周一鑊死都唔認，建仔主席譚耀宗忍唔住贈佢一句「議而不決」。
譚Sir不嬲都唔支持中央屠宰，尋日見周一鑊講啲唔講啲，就好溫和咁話佢哋一向好驚起咗中央屠宰場後要公帑補貼，依家政府拖咗咁多年，好彩有得返轉頭，佢跟住好真誠咁話：「大家都驚屠宰場最後變成大白象，好彩你一直議而不決咋！」
呢番說話引得哄堂大笑，周一鑊面懵懵咁連聲否認政府議而不決，跟住猛兜政府一直睇住家吓嘅活雞市場同業界嘅運作等，仲晒命咁話知道依家活雞每斤大概三十蚊左右。佢知道活雞嘅行情，同佢處理中央屠宰雞手鴨腳完全係兩回事，周一鑊拋啲咁簡單嘅資訊就想認叻，真係笑死人咩。