全國政協常委徐展堂喺北京中風入院，事隔近三個禮拜，依家都仲未醒番。新鴻基地產非執行董事郭炳湘去過醫院探佢，尋日話徐展堂手術好成功，已經脫離危險期，佢嘅家人已經搵咗一組最好嘅醫生照料佢。郭炳湘同徐展堂都係全國政協常委，每三個月就要上京開常委會，所以有好多接觸。
講到政改進展，郭炳湘話要循序漸進，仲用「一隻大船唔可以突然間一百八十度轉彎」嚟形容政改唔可以操之過急，不過佢相信香港最終會有全民直選。至於功能組別存廢問題，佢認為香港咁多年嚟都係以經濟發展為主導，功能組別可以畀工商界參與政治，所以有其存在嘅歷史意義。不過咁，新加坡全部議席都係直選產生，但工商界又未至於冇機會參與，所以佢認為政改都係要摸住石頭過河。
至於下一屆特首人選嘅條件，郭炳湘認為咩背景人士都冇所謂，最緊要有能力、全心全意為香港，同埋要令中央放心同易於溝通。