黃毓民同「大舊」陳偉業尋日遲到早退，嚟到現場唔夠二十分鐘就閃人，大舊更加一到埗就企埋一邊玩電話，最後要「長毛」梁國雄開到聲叫佢，先肯拎疊《公投報》象徵式派吓，敷衍程度係社民連三子之冠！當日大舊號召「解放香港」惹嚟好多不滿，事後聯委會召集人余若薇要頻頻解畫，話唔係要搞咩「解放」先丟淡件事，但佢尋日話之你，繼續高叫「尋求解放、解放香港」嘅口號，公文袋嘅人惟有當聽唔到，繼續叫「沒有民主，哪有民生」，總之你有你叫，我有我嗌。

具體少少嘅事亦唔見得合拍，大舊話市民即使唔認同「公投」，出嚟投白票都總好過唔投，以免拖低投票率；公文袋嘅袋巾傑就嗌市民千祈唔好投白票，因為白票呢件事存在好大嘅演繹空間，如果好多人都投白票嘅話，「公投」分分鐘站唔住腳。咁叫同一陣線咩？咪夾硬喺埋一齊啦！