西九文化區管理局行政總裁一職拖咗兩年幾都未有繼任人選，尋日政府終於宣布個位由歐洲最大多元藝術場地巴比肯中心嘅藝術總監謝卓飛（Graham Sheffield）擔任，八月中履新，任期三年。謝卓飛尋日首次出嚟見傳媒，佢雖然喺多個藝術領域面面俱精，但就唔識粵劇，管西九會唔會有偏頗呢？
謝卓飛學鋼琴出身，喺音樂、戲劇、舞蹈、電影、視覺藝術各方面樣樣俱精，九五年開始管理巴比肯中心，行政經驗豐富。佢話，二十幾年前已經嚟過香港，感受過本地嘅文化藝術，近年都嚟過香港出席文化活動，雖然唔識粵劇，不過會保持同唔同嘅藝團溝通，相信成個西九文化區入面咁多人手，大家可互補不足喎！
