瑞士巴塞爾世界鐘錶珠寶展覽會（Baselworld）近尾聲，香港富商、英皇集團主席楊受成同太太陸小曼，仲有喺英皇鐘錶珠寶擔任董事總經理嘅囡囡楊諾思，亦啱啱去完展覽會返嚟。Baselworld雲集世界名錶參展商，楊生去到嗰度深受禮遇。
英皇鐘錶珠寶同勞力士合作無間，今次楊生過到去，當然唔會錯過去佢哋嘅勞力士展覽館參觀啦，勞力士董事局主席Mr. Bruno Meier同佢哋香港區董事總經理Mr. Daniel Neidhart親自到館外迎接，相當畀面。依家英皇鐘錶珠寶同勞力士分別喺銅鑼灣同尖沙咀嘅1881開咗兩間專賣店，其中1881更加係勞力士全亞洲區最大嘅專門店，嚟緊五月英皇仲會喺北京國貿商城第三期開多一間勞力士旗艦店添。
另一個名錶品牌百達翡麗，同英皇鐘錶珠寶合作咗超過四十年，英皇仲係佢哋喺香港最大嘅零售商，楊生今次過去，又點少得去佢哋嘅展館參觀呢？百達翡麗董事長Mr. Thierry Stern、顧問Mr. Philippe Stern同太太同樣親自到展覽館外迎接楊生一行人，可見楊生相當有面子。