林鄭尋日出席個電台節目，主持人講番強拍條例同保育永利街，都令林鄭成為眾矢之的，問佢會唔會因此有好大壓力同需要減壓，甚至有冇學煲呔曾咁擦吓鞋呢？

林鄭輕輕一笑話：「我就唔識擦鞋。」換言之都唔會用呢種方法嚟減壓啦！佢之後笑笑口解釋話：「女仔着嘅鞋好多都唔使擦嘅。」短短兩句話已經透露佢對擦鞋嘅態度，一句講晒，煲呔曾嘅擦鞋減壓妙方真係獨家到極。寸完煲呔曾，佢又講到保育永利街，重申呢個決定同攞獎影片《歲月神偷》完全冇關係，亦唔係因為套戲攞獎，政府先決定保育。佢話早喺○八年政府已經決定保育永利街，言語間好似暗示政府比《歲月神偷》嘅製作班底先知先覺！

民主阿婆獻上死亡之吻

林鄭嘅辯才同暗地裏寸人嘅功力真係幾高深，早前佢以「不撤回、不修訂及不重提」嘅三不方案，去立法會推銷降低強拍門檻時，已經畀人鬧喺度威脅；跟住爆句「我點會咁蠢叫你信我一個人呀……」，又被認為係揶揄保安局前局長葉劉淑儀嘅金句，家吓又周圍辣火頭，會唔會太勇呢？

不過，「民主阿婆」陳方安生似乎好鍾意佢咁勇，佢尋日同傳媒茶敍時，就一輪嘴話林鄭「有魄力、有幹勁、唔怕事、夠積極」，仲話呢幾項都係一個政務司司長人選應有嘅條件。民主阿婆可能以為自己好有影響力，喺重要人事問題上指指點點，但林鄭就要多得佢唔少，事關民主阿婆嘅祝福分分鐘係政治負資產甚至係「死亡之吻」，佢衰多口可以當發噏風，但林鄭咁多年打生打死番嚟嘅政治前途就慘喇。