小白觀點：重賞下網民實變乖

谷歌又玩嘢，宣布停止審查google.cn，仲將個搜尋器redirect嚟香港。喂！玩還玩，唔好搵香港嚟玩得唔得？唔怪之得香港成日畀人話係反動基地啦，煲呔曾畀人擺上台，呢劑慘囉！

你知啦，香港假假哋係國際大都會，資訊流通自由，政府好難用行政手段干預。不過硬嘅唔得，可以由軟入手，反正成班副局長、政治助理咁得閒，不如返工幫手砌多啲假link放上網魚目混珠，當有人諗住click入釋放乜乜網時，彈出嚟嘅竟然係煲呔曾《回家真好》卡通片，再click另一個物物功嘅網，竟然彈出鬍鬚曾攝青鬼宣傳片，click得一百幾十次自然會氣餒。

此外，當局亦可以學勞工處嗰招，向國內網民現兜兜派錢，以後同胞唔上各大敏感網站超過三個月，即派五千蚊獎金，利字當前，唔單止一般網民支持，就算台獨疆獨分子都響應呀！

e-mail：sunsiupak@gmail.com

Blog：http://sunsiupak.blogspot.com

阿豪觀點：國產防火牆揚聲威

谷歌喺中國話走又唔走，依家終於出招嘞，佢哋啱啱宣布停止審查google.cn，又將個網直接連去google.com.hk，話「歡迎您來到谷歌搜索在中國的新家」喎……睇嚟今次google係堅喎！

呢場攻防戰真係好睇嘞，眾所周知，我哋偉大祖國有偉大嘅防火牆Great Firewall（GFW）啦，谷歌今次咁搞法，將個搜尋網頁自動轉去唔會有審查嘅香港Google，雖然話click入去都未必睇到嘢，但都已經帶領內地網民翻咗半面牆，好大鑊啫！

嗱，其實大家咪睇GFW好家傳戶曉咁，原來據聞Twitter（推特）共同創辦人Jack Dorsey，都係最近同內地網民開研討會前準備講詞嘅時候，「惡補」之下先知道有GFW咋，所以今次谷歌咁搞法，實行將GFW嘅知名度進一步提高！

e-mail：lukchiho75@hotmail.com

Blog：http://lukchiho.blogspot.com

網友觀點……

谷　　氣：玩大啲將個網直接連結去台灣，睇吓點？

公園阿伯：又唔係全面撤出，似係喺度整色整水耍手段！

谷　　谷：谷歌嚟中國唔係求財係求原則，美國佬做生意手法確出奇！

哨　牙　強：谷歌呢招簡直係商業笨招，點向股東交代呀？

有料爆：

連部長都有假，假的真不了呀！

SMS傾埋一份：6016 2496