勞工處吹水唔抹嘴，話計劃可以改善「有工冇人做，有人冇工做」嘅情形，因為現時個別行業有大量空缺，希望透過輔導減輕錯配咁話。點知計劃一公布就已經劣評如潮，工會、僱主同學者都話政府諗得太簡單，計劃不切實際。

政府出錢幫市民搵工，點解市民唔領情呢？冇錯，現時香港確係「有工冇人做，有人冇工做」，不過，唔通每人派番幾千蚊，就可以變成人人有工開咩？不妨打個比方，如果有一班未婚男士同一班未婚女士，即係內地叫做剩男剩女嗰隻，你去同某位女士講，我畀啲錢你，你去嗰班男士當中搵番個老公啦，人哋會點諗？婚姻係要情投意合、兩相情願嘅，搵工亦係一樣，如果份工唔啱自己做，夾硬做都冇癮啦。

咁勞工處介紹嘅工又有乜唔妥呀？好簡單啫，正如有工會人士話齋，有四大問題：人工低、工時長、工作地點偏遠、工種厭惡性，呢啲問題都唔係獎勵幾千蚊就可以解決。

喺勞工處工作空缺當中，冇人吼嘅多數都係雜工、清潔工之類，例如有份清潔工，月薪五千一百大元，每日要做十幾粒鐘。大佬，租住板間房都要千幾二千蚊啦，現時百物騰貴，食碟飯都要二三十蚊，如果住得遠，每月仲要幾百蚊車費，五千蚊點夠使呀？

講出嚟嚇你一驚，日前有項調查顯示，全港現時時薪低於二十蚊嘅打工仔，一共有二萬八千幾人。咁嘅人工，自己都唔夠使，又點養老婆仔女呀？領綜援咪仲好過，何必捱得咁辛苦？叮！

就連研究人力資源嘅學者都覺得政府呢種「利誘搵工」嘅做法行唔通，因為派錢成效短暫，無法挽留員工。

一句講到尾，呢個「就業導航試驗計劃」係有姿勢、冇實際，只係一場騷。政府搞咁多花臣係冇用嘅，要解決問題，仲係要快啲推動最低工資立法。

話時話，最低工資立法講就容易，做起嚟就難。僱主同僱員各有各講，各不相讓。嗱，早日有個工商界議員提議，將最低時薪訂為二十蚊，就畀人炳到七彩。做老闆嘅梗係想人工低啲啦，但係打工仔就希望最低工資訂得愈高愈好，到時一定拗餐懵嘅。就睇政府有冇能力協調嘞。

所以奉勸勞工處處長張建宗，唔好再諗埋晒嗰啲唔等使嘅計劃嘞，一心一意搞好最低工資立法啦。否則，就業錯配嘅問題，永遠都無法解決。