早前有個菲律賓旅行團嚟香港畀人「賣豬仔」嘅事件，當時「旅遊超人」、立法會旅遊界議員阿Paul謝偉俊搶韁，率先安排班旅客入住酒店，跟住同傳媒力數相關嘅政府部門、旅議會同旅發局都潛咗水，擺明係寸身兼經濟動力成員嘅旅議會主席胡兆英。咁嘅舉動，令人聯想係因為下屆立法會換屆選舉嘅爭逐戰。
雖然事隔兩個星期，大家並未下火。話說尋日深圳機場喺香港新開設嘅城市候機樓開張，胡兆英同阿Paul可謂冤家路窄。胡兆英唔肯正面回應係咪會參選，但就批評阿Paul做得未夠好，希望佢作為議員「睇嘢睇廣啲」喎！
佢舉例話，好似賣豬仔單嘢，議會無論對旅客嘅要求同行程安排，都比議員清楚，亦唔需要議員去做呢啲嘢喎，臨尾仲話：「冇人可以做晒所有層面嘅工作，如果跟住分工做，大家合作會更愉快囉！」咁講，擺明係拮番阿Paul轉頭，寸佢霸晒啲嘢嚟做搶功勞啫！
阿Paul又點睇胡兆英番說話呢？佢話：「有乜出奇吖，佢下下都對着我幹啦！」又話依家下屆係咪循旅遊界競逐連任言之尚早，唔排除下屆會參與直選添！