但建制派對出發日期都有分歧，富貴黨方剛直言開幕日主人家要接待外國元首，香港議員根本未夠級數出席；專業會議梁美芬都覺得議員唔應該咁霸道話一定要去睇開幕，但佢話真係好想睇開幕喎。工聯會黃國健就話世博開幕日係五一勞動節，撞正勞工界大日子，工聯會有好多活動要搞，所以希望行程就一就。

吳文華打圓場

拗完日期傾行程，仲要拗到同黨同派都一樣冇面畀。好似建仔嘅陳鑑林建議參觀世博嗰陣順道訪問內地金融事務辦公室，點知該黨主席譚耀宗毫不客氣反對：「唔可能啦！冇時間，我哋唔可以咁貪心。」梁美芬就興高采烈話贊成旅遊界謝偉俊建議，唔搭直航機改乘高鐵去上海，最好請埋高鐵專家沿途講解，但專業會議盟友劉秀成話高鐵幾時都可以搭，此行唔想搭高鐵喎。

眾人七嘴八舌拗一餐，最終都冇共識，又變咗典型嘅立法會口水會，最終要立法會秘書長吳文華出面打圓場，話會總結議員意見後交畀立法會主席，再由主席去信中聯辦反映各人意願。