預算案喺遏抑炒風方面早已為人詬病，煲呔曾日前上電台又信誓旦旦話自己日日都關注樓價，若果有人為造市，政府一定會跟進。不過呢啲花招畀平叔一語道破，佢反問既然預算案講明唔容許人為製造訊息混亂，甚至煲呔曾、鬍鬚曾都開晒聲，點解政府仲唔盡快做嘢？

氣憤難平嘅平叔仲將矛頭指向日前微服出巡、落區睇示範單位嘅運輸及房屋局局長鄭汝樺。平叔話撇開復建居屋唔講，單單小業主同豪宅買家嘅待遇已經有天淵之別，咁嘅情況，鄭汝樺仲使乜睇示範單位？點解又喺度猶豫唔做嘢？

唔應靠功能組別維持管治

數完樓市問題都未夠喉，平叔鬧埋發展局局長林鄭月娥。話說上個星期三立法會通過降低強制拍賣門檻，平叔表明反對降低強拍門檻，因為市民嘅私有產權十分重要，所以門檻唔能夠輕易降低，可惜延遲實施嘅修訂喺分組點票下被功能組別議員否決，佢認為政府唔應該依靠功能組別議員嚟維持管治，應該自己反思一下。

政府嘅問題的確罄竹難書，意猶未盡嘅平叔仲將政府經常掛喺口邊嘅「官商民合作」揶揄一番。事關佢覺得商都係民，但係商竟然可以排喺民前面，而且政府期望工商界有企業良心，點解政府唔自己處理啲不公平現象呢？

雖然鬧得好暢快，但平叔不忘話香港叻在有自由，如果唔係佢講咁多做乜嘢，否則可能退休金都冇埋！難怪佢喺論壇討論香港係咪要先經濟、後民主係錯啦，因兩者根本無分先後！