小白觀點:唔去西安都睇到兵馬俑

個天一片灰蒙蒙，空氣污染指數爆晒燈，我國輸出有毒食物，害人用品已唔係新奇事，依家仲要輸出劣質空氣。唔使多講，大家有眼見，滾滾黃沙籠罩香港，搞到好多小市民都唔揸車返工，但唔好以為佢哋咁乖響應環境局局長邱騰華呢班廢官嘅建議，以小白老弟為例吖，落露天車場一睇，架架都係泥黃色，搵唔番部車，想揸都冇得揸。卒之搭港鐵去銅鑼灣走咗轉，人頭依然湧湧，但個個一身泥塵，嘩，唔使買機票去西安，似足兵馬俑陣咁呀。

聽講話呢次沙塵暴過埋海峽擴散至台灣、日本及南韓，聽聞隨時殺到去美加，可以稱得上名副其實嘅「黃禍」，難怪南韓網民愈諗愈嬲，希望嗰位遲早被屈當係韓國人嘅諸葛亮先生可以顯靈，借風將沙塵吹番入去中國。真係黑心！我決定罷睇火紅韓劇《Iris》一天抵制！

Blog:http://sunsiupak.blogspot.com

阿豪觀點:環保署垃圾「預警」靠害

好恐怖呀！香港出現史上第一次沙塵暴，漫天風沙咁，空氣污染指數仲高過最高嘅五百添，連急症室都逼滿呼吸道唔舒服嘅病人。真係唔明，點解天文台同環保署好似完全冇預警咁嘅？

不過咁，又唔係完全話冇嘅，環保署前日凌晨都警告過話，之不過成篇嘢都係嗰啲例牌菜式，都係話空氣污染指數會好高，呼籲對空氣污染敏感嘅市民要小心啲。嘩，唔係啩，呢啲都算係「警告」？擺到明就係政府嗰啲罐頭公文信啦，改過個日期時間就可以循環再用，就好似啲所謂「旅遊警告」咁呀，咪又係千篇一律，市民睇完之後，根本唔會知道有幾危險。

不如咁啦，依家內地乜嘢都係假，反正都預測唔到啦，咁不如索性賴呢啲內地吹落嚟嘅，係假風沙，對人身係冇害嘅，大家毋須恐慌，繼續正常活動得嘞！

Blog:http://lukchiho.blogspot.com

網友觀點

阿毛：後知後覺係政府部門嘅特色，下次會識預警喇。

五金佬：如果有預警，一早入定多啲防沙口罩咁就發喇！

阿水：呢味中國風沙發瘟雞，日本仔都嚇怕！

白頭佬：落街行個圈，返嚟包你白髮變黑髮！