香港政府係全港最大業主，擁有無數物業，如果呢啲物業都物盡其用，庫房想唔水浸都幾難。可惜有人捉到鹿唔識脫角。嗱，審計署○八年就狂炳政府產業署冇充分利用具有重大商業價值嘅政府物業，影響庫房收入。政府產業署當時死死氣話會好好檢討，點知原來係批評接受，一切照舊。

政府產業署署長郭家強日前承認，前兩年，有七十六項政府物業被界定具有商業發展潛力，後來署方又界定當中三十七項唔適合商業用途，其餘三十幾項透過招標形式放租，只有七項成功租咗出去。

咁就奇嘞，明明話七十六個物業都有商業發展潛力，點解忽然又有接近一半變咗冇發展潛力嘅？其實唔使大驚小怪，即係咁，如果你係業主，有層樓想出租，梗係將佢執番靚先至畀人睇樓啦，如果爛糟糟咁，人哋一睇就唔開胃啦，又點會租呀？可惜產業署以為政府物業係皇帝女唔憂嫁，連裝修都懶，邊度會有人吼呀。依家畀人踢爆，佢哋就話改裝技術有問題喎，之不過，如果層樓係郭署長自己嘅，睇吓仲會唔會有問題吖嗱？叮！

係咁，租咗出去嗰幾個物業用嚟做乜嘢呀？好失禮，多數做咗政府部門嘅飯堂。有冇搞錯？政府部門用嚟做飯堂，咪即係左手租畀右手，庫房邊度有收入呀？仲有噃，呢啲物業都喺鬧市區嘅黃金地段，如果租出去做商場，每個月閒閒地都有十幾萬租金入袋啦，一年就係百幾萬蚊。如果幾十個物業都租晒出去，分分鐘億億聲。產業署咁搞法，唔通嫌錢腥咩？

講開又講，其實○八年審計署就狂批產業署將位於旺角黃金地段嘅工業貿易署大樓用嚟做員工康樂室同埋學生資助辦事處，係冇物盡其用。產業署照理冇咁快唔記得啩，可惜佢哋根本冇吸取教訓。

叮佢個鎯鎯！三年先至租咗七個物業出去，離唔離譜啲呀！難怪有經濟學家話，政府不嬲嘥錢出晒名，資源運用極有問題。本來呢，多租一個物業出去，庫房就多一筆收入，就多一筆扶貧資源。經濟不景，市民要求政府攞錢出嚟派糖，班高官就牙痛咁聲，但係家陣有機會為庫房進帳，佢哋又懶懶閒，唔怪得個個都話產業署係敗家仔啦。