本文重點
沙田馬場早前上演香港打吡大賽，見到退休練馬師「食力簡」簡炳墀戴住黑超入場睇好戲。大會喺現場展出一部價值七百幾萬元嘅頂級轎車MAYBACH造勢，唔少人睇見都心動，反而食力簡就話冇乜大不了啫，佢數數屋企個車房，話單係Benz就有三部，勞斯萊斯亦有三部，如果畀佢揀嘅話，就想揸勞斯萊斯多啲，事關出街成隻蟹咁，夠殺氣喎！
食力簡愈講愈牙擦，自爆買勞斯萊斯亦唔使分期，佢邊晒命邊攞出身上一張AE黑卡，話用佢碌一碌，買幾百萬房車都係一鋪清，唔使煩。
80年代買樓一年還清
咁人生中有冇試過分期付款呀？食力簡諗起八十年代購入價值四百幾萬嘅大埔康樂園時，問過銀行借錢，但年期短到你唔信，就係一年咁大把，事關嗰年馬運亨通，獎金滾滾來，結果唔使一年還清樓債，真巴閉。