相信好多人都諗住喺遲啲一連五日嘅復活節假期出外旅遊充吓電，但台灣駐港最高代表、中華旅行社總經理楊家駿就決定留喺香港。楊總話平時喺香港日日做到冇停手，冇乜機會周圍逛吓，所以決定利用嚟緊呢個長假，做個全職遊客，好好了解香港喎。佢仲透露，已經計劃好去西貢行山、坐昂坪360纜車同埋去銅鑼灣歎壽司，節目認真豐富。
移居香港一段日子嘅楊總話，佢同家人都幾鍾意呢度嘅生活，又讚香港夠晒熱鬧，人亦好friendly，唯一未習慣嘅，就莫過於香港人嘅極速步伐嘞。楊總話台灣人行路冇香港人咁急，亦都唔會好似香港人咁攰死都唔休息，覺得咁樣「比較符合人性」喎。換句話講，楊總即係想叫香港人生活得輕鬆啲。
香港同台灣都以美食聞名，楊總就認為講到美食呢個範疇，台灣應該略勝一籌喎。佢言下之意唔係話香港嘅嘢唔好食，只係佢認為香港好質素嘅美食比較貴，唔係人人都負擔得起，相反台灣就一街都係各式各樣嘅地道平民小食。