本港空氣污染指數尋日創歷史新高，環境局局長邱騰華喺中午急急拉埋各部門官員同專業人士喺政府總部交代詳情。除咗見慣大場面嘅邱局長表現較淡定外，其他人都好似塊木頭咁表現生硬，當中以環保署助理署長（空氣質素政策科）莫偉全就最緊張兼騰雞。
可能係較少面對傳媒，每次輪到莫偉全上前發言，佢都將手上嘅文件重重咁放低，好似要事先壯膽咁，但係壯膽都冇用，佢一直都答非所問。記者問佢依家本港空氣污染指數頂晒籠都係得五百，如果指數升超過五百後會點處理呢？又會唔會設立類似紅雨同黑雨嘅機制，等啲市民同學童做好啲準備呀？佢竟然答︰「唔排除指數可能會增加，但依家已經喺高水平，正如局長咁講，市民唔好做太多劇烈運動。」真係畀佢激死！