話說富貴黨主席劉健儀提及新加坡有環球影城，澳洲亦有唔少新景點，但香港淨係單靠內地客撐住旅遊業唔多夠，人家喺香港做好多電視嘅旅遊推廣，但喺外國就見唔到旅發局嘅宣傳片，咁政府究竟有乜大計吸多啲外國遊客先？

Rita諗住推畀旅發局答，點知一開口就話：「呢個問題就交畀旅發局總裁劉鎮漢講吓啦！」總裁？乜旅發局有總裁嘅咩？跟住財委會主席劉慧卿冇即時指正Rita嘅錯處，只係大大聲逐字逐句咁話：「旅發局總幹事劉鎮漢就講清楚啦！」擺明係講畀Rita聽。

之不過，Rita仲係好似夢遊咁一錯再錯。跟住白鴿黨主席鐵頭仁問貿發局盤數係咪應該交畀立法會睇吓呢？點解貿發局可以唔納入審計署審計嘅範疇呢？點知Rita竟然連續兩次噏錯貿發局做旅發局，呢次卿姐真係忍唔住口，問Rita做乜淨係掛住旅發局？畀人兜口兜面咁話，Rita先如夢初醒，話貿發局同旅發局都掛住，因為兩個局都係佢局內嘅範疇。

嗌唔出周一鑊個名

鬧醒咗應該好啲喇啩！又唔係喎。事關差不多到尾聲嘅時候，飲食界代表張宇人話香港打造紅酒中心，而外國啲酒莊可以做埋餐飲服務，但香港就唔得，咁政府喺發牌度可唔可以彈性處理，畀佢哋開埋餐廳呢？

呢個問題唔係Rita自己可決定，於是佢話同周……，噏極都噏唔到落去，最後先話同周局長研究吓。佢想講嗰個咪係食物及衞生局局長周一鑊囉！估唔到佢呢次冇噏錯，而係噏唔出。